निर्वाचन २०८२
झापा-५ बाट बालेन्द्र शाह भारी मतान्तरले विजयी
झापा क्षेत्र नम्बर ५ को अन्तिम मत परिणाम सार्वजनिक भएको छ, जसमा राष्ट्रिय स्वतन्त्र पार्टीका उम्मेदवार बालेन्द्र शाह (बालेन) ऐतिहासिक मतान्तरका साथ प्रतिनिधि सभा सदस्यमा निर्वाचित हुनुभएको छ। शनिबार साँझ सार्वजनिक गरिएको आधिकारिक तथ्याङ्क अनुसार शाहले आफ्ना निकटतम प्रतिद्वन्द्वी नेकपा एमालेका अध्यक्ष तथा पूर्व प्रधानमन्त्री केपी शर्मा ओलीलाई करिब ५० हजारको विशाल मतान्तरले पराजित गर्नुभएको हो।अन्तिम चुनावी नतिजा अनुसार बालेन्द्र शाहले ६८,३४८ मत प्राप्त गर्नुभएको छ भने केपी शर्मा ओलीले १८,७३४ मत मात्र प्राप्त गर्नुभएको छ। यो विजयलाई नेपालको संसदीय इतिहासकै एक ठूलो राजनीतिक उथलपुथल र 'जेनजी' (Gen Z) आन्दोलनको ठूलो सफलताका रूपमा हेरिएको छ। रास्वपाले चुनावी अभियानका क्रममा शाहलाई नै भावी प्रधानमन्त्रीको रूपमा अघि सारेकाले अब देशले नयाँ र युवा नेतृत्व पाउने निश्चित देखिएको छ।निर्वाचित भएपछि प्रमाणपत्र ग्रहण गर्दै शाहले यो जित जनताको परिवर्तनप्रतिको अटल विश्वास र चाहनाको प्रतिबिम्ब भएको बताउनुभएको छ। यतिबेला झापाको दमक लगायतका क्षेत्रमा विजयोत्सव मनाइँदैछ र समर्थकहरूले यसलाई नयाँ युगको सुरुवातको रूपमा व्याख्या गरेका छन्।
झापा- ५ मा बालेनभन्दा ओली २० हजार मतले पछाडी
झापा ५ मा राष्ट्रिय स्वतन्त्र पार्टी रास्वपाका उम्मेदवार एवं पार्टीका वरिष्ठ नेता बालेन्द्र शाहले २८ हजार १५२ मत प्राप्त गर्दै अग्रता कायम राखेका छन्।सम्पन्न प्रतिनिधिसभा सदस्य निर्वाचनको जारी मतगणनाअनुसार ४४ हजार ३५० मतको गणना सम्पन्न हुँदा उनले उक्त मत प्राप्त गरेका हुन्।निर्वाचन अधिकृतको कार्यालयका अनुसार सो क्षेत्रका नेकपा एमालेका उम्मेदवार एवं अध्यक्ष केपी शर्मा ओलीले सात हजार ३९३ मत प्राप्त गरेका छन्।यसैगरी, श्रम संस्कृति पार्टीका समीर तामाङले चार हजार ११५ मत, नेपाली कांग्रेसकी उम्मेद्वार मन्धरा चिमरियाले ८२४ मत, नेपाली कम्युनिस्ट पार्टीका रञ्जित तामाङले ७३६ मत र राष्ट्रिय प्रजातन्त्र पार्टीका लक्ष्मीप्रसाद संग्रौलाले ६६२ मत प्राप्त गरका हुन्।
झापा क्षेत्र नं. ५: निर्वाचनको सम्पूर्ण तयारी पूरा
भोलि बिहीबार हुने प्रतिनिधिसभा निर्वाचनका लागि झापा क्षेत्र नम्बर ५ मा मतदानको सम्पूर्ण तयारी पूरा भएको छ। जिल्ला निर्वाचन कार्यालय र स्थानीय प्रशासनले मतदान केन्द्रहरूको भौतिक व्यवस्थापन, सुरक्षा प्रवन्ध र कर्मचारी खटाउने कार्य सम्पन्न भएको जानकारी दिएको छ।निर्वाचन कार्यालयका अनुसार झापा क्षेत्र नम्बर ५ मा कुल १८५ मतदान केन्द्रहरू तय गरिएका छन्, जहाँ १ लाख ६३ हजार ३७९ मतदाताले आफ्नो मताधिकार प्रयोग गर्नेछन्। स्थानीय तहगत विवरण अनुसार दमक नगरपालिकाका १० वटा वडामा ७२ वटा मतदान केन्द्र र ६५ हजार ९९७ मतदाता रहेका छन्। त्यस्तै, गौराहद नगरपालिकाका ८ वटा वडामा ५१ वटा केन्द्र र ४१ हजार ४७५ मतदाता छन् भने कमल गाउँपालिकाका ७ वटा वडामा ४५ वटा केन्द्र र ४० हजार ७८६ मतदाता रहेका छन्। गौरीगन्ज गाउँपालिकाका वडा नम्बर ३, ४, ५ र ६ मा १७ वटा केन्द्र तोकिएका छन्, जहाँ १५ हजार १२१ मतदाताले मतदान गर्नेछन्।निर्वाचनलाई शान्तिपूर्ण र निष्पक्ष बनाउन आज सबै मतदान केन्द्रहरूमा सर्वपक्षीय बैठक सम्पन्न भएको छ। सुरक्षाका लागि नेपाल प्रहरी, सशस्त्र प्रहरी र म्यादी प्रहरीको विशेष टोली परिचालन गरिएको छ। सुरक्षा समन्वय इकाइका अनुसार संवेदनशील मानिएका केन्द्रहरूमा हेलिकप्टर र मोबाइल टोलीमार्फत समेत कडा निगरानी गर्ने व्यवस्था मिलाइएको छ।मतदान सम्पन्न भएलगत्तै मतपेटिकाहरू सुरक्षित रूपमा संकलन गर्न दमकस्थित अर्गानिक कृषि बजारमा मतगणना स्थल तयार पारिएको छ। सुरक्षा संवेदनशीलतालाई ध्यानमा राख्दै मतगणना स्थलमा तारजाली र सीसीटीभी क्यामरा जडान गरिएको छ। निर्वाचन अधिकृत विदुरकुमार कार्कीका अनुसार प्रत्येक मतगणना टोलीमा ४ जना कर्मचारी रहने गरी जनशक्ति परिचालन गरिएको छ।यस पटक झापा क्षेत्र नम्बर ५ लाई निकै चासोका साथ हेरिएको छ। यहाँ नेकपा एमालेका अध्यक्ष एवं पूर्व प्रधानमन्त्री केपी शर्मा ओली र राष्ट्रिय स्वतन्त्र पार्टीका तर्फबाट बालेन्द्र शाह (बालेन) बीचको प्रतिस्पर्धा मुख्य आकर्षणको केन्द्र बनेको छ। निर्वाचन आयोगले सम्पूर्ण मतदाताहरूलाई निर्धक्क भई आफ्नो मताधिकार प्रयोग गर्न आह्वान गरेको छ।
झापा ५ को मतगणनास्थलमा सेनाको प्रत्यक्ष संलग्नता
देशकै प्रमुख चासो र ध्यानकेन्द्रित भएको झापाको क्षेत्र नम्बर ५ को प्रतिनिधिसभा सदस्य निर्वाचनको लागि नेपाली सेनाले मतदान केन्द्रसँगै मतगणनास्थलको तयारी गरेको छ ।झापा ५ को मतगणना निर्वाचन अधिकृतको कार्यालय रहेको दमकको अर्ग्यानिक कृषि भवनमा हुने भएको छ । भोलि मतदान सम्पन्न भइसकेपछि झापा ५ को ६१ वटा मतदानस्थलको मतपेटिका गणनाका लागि त्यस भवनमा लगिने भएको छ । मतगणनाका लागि मतगणनास्थलको तयारी भइसकेको नेपाली सेनाका एक अधिकारीले बताए ।सेनाको प्रत्यक्ष संलग्नतामा मतगणनास्थलको व्यवस्थापन गरिएको हो । मतगणना बिथोल्न नसक्नेगरी मतगणनास्थलको व्यवस्थापन गरिएको ती अधिकारीले बताए । सेनाले अन्तिम मत परिणाम नआइन्जेलसम्म मतगणनास्थलको पहरा दिने योजना बनाएको ती अधिकारीले बताए ।
झापा ५ मा वालेन्द्र शाहको चुनावी सङ्कल्प: सुशासन र समृद्धिको स्पष्ट मार्गचित्र
दमक, नेपालको बदलिँदो राजनीतिक परिवेशमा सुशासन र समृद्धिको एजेन्डालाई मुख्य प्राथमिकता दिँदै राष्ट्रिय स्वतन्त्र पार्टीका तर्फबाट झापा क्षेत्र नम्बर ५ का प्रतिनिधि सभा सदस्य उम्मेदवार वालेन्द्र शाहले आफ्नो विस्तृत कार्ययोजना र वाचा पत्र सार्वजनिक गर्नुभएको छ। नेपालको संविधान २०७२ को पूर्ण परिपालना गर्दै नागरिकका आधारभूत अधिकारलाई व्यवहारमा उतार्ने सङ्कल्पका साथ उहाँले संघीय संसदमा आफ्नो उपस्थितिको औचित्य प्रस्ट पार्नुभएको हो। शाहले सार्वजनिक गर्नुभएको यस घोषणापत्रले केवल नीतिगत सुधार मात्र नभई झापा ५ को समग्र विकास र आम नागरिकको दैनिक जीवनमा प्रत्यक्ष प्रभाव पार्ने खालका योजनाहरूलाई समेटेको छ। राजनीतिलाई पेसा नभई सेवाको रूपमा स्थापित गर्ने प्रतिबद्धता जनाउँदै शाहले बेथिति र भ्रष्टाचार विरुद्ध संसदको अग्रपंक्तिमा उभिएर राष्ट्रिय नीति तथा बजेटमा आफ्नो क्षेत्रको मुद्दालाई सशक्त रूपमा उठाउने अठोट व्यक्त गर्नुभएको छ।सङ्घीय सांसदको भूमिकालाई प्रभावकारी बनाउन शाहले कानुनी जटिलताहरूलाई हटाउँदै नागरिकमैत्री कानुन निर्माण, संशोधन र परिमार्जनमा जोड दिने लक्ष्य राख्नुभएको छ। विशेष गरी सम्बन्धित मन्त्रालयहरूसँग समन्वय गरी सङ्घ, प्रदेश र स्थानीय तहका विकास योजनाहरूको प्रभावकारी अनुगमन गर्ने कार्यलाई उहाँले प्राथमिकतामा राख्नुभएको छ। स्थानीय जनताका समस्या र आवाजलाई संसदमा निरन्तर मुखरित गर्दै नेपाल सरकार र जेन-जी बीच भएका सम्झौताहरूको पारदर्शी कार्यान्वयन सुनिश्चित गर्ने उहाँको योजना छ। झापा क्षेत्र नम्बर ५ मा एउटा व्यवस्थित संसद सचिवालय स्थापना गरी स्थानीय सरोकारका विषयहरूलाई तत्काल सम्बोधन गर्ने र नागरिकको मतलाई परिणाममुखी काममा रूपान्तरण गर्ने दृढता उहाँले प्रकट गर्नुभएको छ। थिति बसाल्ने सङ्कल्पका साथ आएको यो अवधारणाले सार्वजनिक सेवालाई चुस्त दुरुस्त बनाउनुका साथै विकास र प्रकृति संरक्षणको सन्तुलन मिलाउने विश्वास गरिएको छ।शिक्षा क्षेत्रमा क्रान्तिकारी परिवर्तन ल्याउन वालेन्द्र शाहले काठमाडौँ महानगरपालिकामा सफल रूपमा कार्यान्वयन भएको शिक्षामा सीप कार्यक्रमलाई झापामा पनि लागू गर्ने योजना अघि सार्नुभएको छ। गरिब तथा विपन्न परिवारका बालबालिकाले गुणस्तरीय शिक्षा पाउनुपर्ने अधिकारलाई व्यवहारमा सुनिश्चित गर्दै उहाँले विद्यार्थीहरू वैदेशिक रोजगारीमा जानुपर्ने बाध्यतालाई न्यूनीकरण गर्ने लक्ष्य लिनुभएको छ। सामुदायिक विद्यालयहरूमा स्मार्ट कक्षा, प्रयोगशाला र पुस्तकालयको स्थापना गरी उच्च शिक्षाको स्तरोन्नति गर्ने र स्कुल रिटेन्सन प्रोग्राममार्फत विद्यालय छोड्ने दरलाई शून्यमा झार्ने उहाँको प्रतिबद्धता रहेको छ। साथै, गौरीगञ्जस्थित ऐतिहासिक त्रिभुवन पुस्तकालयलाई डिजिटल अध्ययन अनुसन्धान केन्द्रको रूपमा विकास गर्ने र दमक बहुप्राविधिक शिक्षालयको भवन निर्माण सम्पन्न गरी सञ्चालनमा ल्याउने कार्यलाई उहाँले प्राथमिकता दिनुभएको छ। स्थानीय भाषा र लिपिलाई पाठ्यक्रममा समावेश गर्ने र दमक १० मा रहेको साइन्स पार्कलाई थप व्यवस्थित बनाउने योजनाले यस क्षेत्रको प्राज्ञिक स्तरलाई माथि उठाउने अपेक्षा गरिएको छ।स्वास्थ्य सेवालाई आम नागरिकको सहज पहुँचमा पुऱ्याउन शाहले दमक अस्पताललाई पहिलो चरणमा तीन सय शय्याको अस्पतालमा स्तरोन्नति गर्ने प्रस्ताव गर्नुभएको छ। विपन्न, असहाय र बेवारिसे बिरामीहरूका लागि कुल शय्याको दश प्रतिशत निःशुल्क उपचारको व्यवस्थालाई कडाइका साथ कार्यान्वयन गर्ने उहाँको योजना छ। प्रत्येक घरमा शुद्ध पानी र परिवारमा स्वस्थ कहानीको अभियानमार्फत स्वच्छ खानेपानी सुनिश्चित गर्ने र ज्येष्ठ नागरिक तथा फरक क्षमता भएका व्यक्तिहरूका लागि घरदैलोमै स्वास्थ्य सेवा पुऱ्याउने नीतिगत व्यवस्था गर्ने शाहले बताउनुभएको छ। २४ सै घण्टा निःशुल्क एम्बुलेन्स सेवाको सुनिश्चितता र कोशी आयुर्वेद प्रतिष्ठानको स्थापना गरी प्रादेशिक आयुर्वेद अस्पताललाई सो मातहत सञ्चालन गर्ने योजनाले स्वास्थ्य क्षेत्रमा ठूलो परिवर्तन ल्याउने देखिन्छ। कमलको लखनपुरमा आयुर्वेदिक सेवाको विस्तार र अपाङ्गता पुनस्र्थापना केन्द्रको निर्माणले यस क्षेत्रका नागरिकलाई आधुनिक र परम्परागत दुवै उपचार पद्धतिमा सहज पहुँच दिलाउने छ।पूर्वाधार विकासका सन्दर्भमा अधुरा रहेका योजनाहरूलाई निश्चित समय सीमाभित्र सम्पन्न गर्ने उहाँको ठोस योजना रहेको छ। दमक-रवि-चिसापानी सडकको निर्माण कार्यलाई यथाशीघ्र सम्पन्न गर्ने, विराट बुद्ध पार्क र दमक सभागृह जस्ता योजनाहरूलाई नागरिकको उच्चतम उपयोगिता हुने गरी सञ्चालनमा ल्याउने शाहले अठोट गर्नुभएको छ। आदिवासी जनजातिको कला र संस्कृति झल्किने गरी आदिवासी जनजाति रङ्गशालाको निर्माण गर्ने र दमकलाई पूर्वी नेपालको आइटी हबको रूपमा विकास गर्ने सोच उहाँले अघि सार्नुभएको छ। खोला किनारका क्षेत्रमा हुने कटान र डुबान नियन्त्रणका लागि रतुवा, मावा र अन्य सहायक खोलाहरूमा तटबन्ध निर्माण गर्ने कार्यलाई प्राथमिकता दिइएको छ। ग्रामीण र सीमावर्ती क्षेत्रमा मोबाइल नेटवर्क र इन्टरनेट सेवाको विस्तार गर्दै यातायातको समय र लागत घटाउन ग्रामीण सडक र पुलहरूको स्तरोन्नति गर्ने योजनाले स्थानीय कनेक्टिभिटीलाई सुदृढ बनाउने छ।कृषि र रोजगारीको क्षेत्रमा आत्मनिर्भरता बढाउन शाहले कन्काई-रतुवा सिँचाइ योजनाको विस्तार र लिफ्ट सिँचाइ प्रविधिको प्रयोगमा जोड दिनुभएको छ। प्रत्येक पालिकामा श्रम बैंकको अवधारणा लागू गर्ने र गौरादहमा कोल्ड स्टोर तथा ड्रायर सहितको कृषि भण्डारण केन्द्र स्थापना गर्ने उहाँको योजना छ। किसानहरूलाई उत्पादनमा आधारित मल, बीउ र विद्युत्मा अनुदान दिने प्रणाली लागू गर्दै कृषि उत्पादनको समर्थन मूल्य ग्यारेन्टी गर्ने शाहले बताउनुभएको छ। गौरादह कृषि क्याम्पसलाई कृषि अनुसन्धान हबको रूपमा विकास गरी युवाहरूलाई आधुनिक कृषि पेसामा आकर्षित गर्न विश्वसनीय बिमा र प्रविधिमा आधारित उत्पादन प्रणालीको विकास गर्ने उहाँको लक्ष्य रहेको छ। स्थानीय उत्पादनको ब्रान्डिङ र बजार विस्तारका कार्यक्रममार्फत उद्यमीहरूलाई प्रोत्साहन गर्ने र वैदेशिक रोजगारीबाट फर्केका व्यक्तिहरूका लागि उद्यम प्रवर्द्धनका विशेष कार्यक्रमहरू सञ्चालन गर्ने योजना यस घोषणापत्रमा समावेश गरिएको छ।महिला, बालबालिका र सामाजिक सुरक्षाका सवालमा वालेन्द्र शाहले आमाको नामबाट नागरिकता लिँदा हुने झन्झटिलो प्रक्रियालाई सरलीकृत गर्ने र महिलालाई कृषिमा प्रोत्साहन गर्न सहुलियत दरमा महिला कृषि कर्जा उपलब्ध गराउने योजना अघि सार्नुभएको छ। हिंसामा परेका महिला र बालबालिकाको संरक्षणका लागि सेफ हाउसको स्तरोन्नति गर्ने र महिलाका लागि २४ सै घण्टा सुरक्षित सहर निर्माण गर्न सुरक्षा पूर्वाधार सुदृढ गर्ने उहाँको प्रतिबद्धता छ। भूमिहीन र सुकुम्बासी समस्याको दिगो समाधानका लागि १०० दिनमा आयोग र १००० दिनमा समाधानको नीति अवलम्बन गरी अधिकार सम्पन्न आयोगमार्फत कार्य सम्पन्न गर्ने योजना शाहले सार्वजनिक गर्नुभएको छ। चिया बगान मजदुरसहित सबै श्रमिकको न्यूनतम अधिकार सुनिश्चित गर्न श्रम ऐन परिमार्जन गर्ने र सुशासन कायम गर्न भ्रष्टाचार विरुद्ध शून्य सहनशीलताको नीतिलाई कडाइका साथ लागू गर्ने उहाँले बताउनुभएको छ। अनलाइन गुनासो दर्ता र सार्वजनिक कार्यको प्रगति देखिने डिजिटल ड्यासबोर्ड सञ्चालनले सरकारी सेवामा पारदर्शिता र जवाफदेहिता ल्याउने विश्वास शाहको रहेको छ।संस्कृति र खेलकुदको प्रवर्द्धनमा पनि शाहले विशेष ध्यान दिनुभएको छ। राष्ट्रिय भाक्का दिवसलाई अन्तर्राष्ट्रिय स्तरमा ब्रान्डिङ गर्ने, आदिवासी जनजाति सङ्ग्रहालयलाई व्यवस्थित गर्ने र सम्पूर्ण जातजातिको भाषा र संस्कृतिको संरक्षण गर्ने उहाँको योजना छ। खेलकुदको विकासका लागि बहुआयामिक खेलकुद एकेडेमी निर्माण गर्ने र दमक गोल्डकपलाई व्यावसायिक तथा अन्तर्राष्ट्रिय स्तरमा प्रवर्द्धन गरी यस क्षेत्रको अर्थतन्त्रमा टेवा पुऱ्याउने उहाँको सङ्कल्प रहेको छ। वातावरण संरक्षणका लागि चुरे संरक्षण कार्यक्रम, वैज्ञानिक फोहोर व्यवस्थापन र सिमसार क्षेत्रको संरक्षण गर्ने योजनाका साथ शाहले झापा ५ का मतदातासामु आफूलाई काम गर्ने अवसर दिन आग्रह गर्नुभएको छ। उहाँको यो बृहत्तर योजनाले झापाको यस निर्वाचन क्षेत्रलाई आधुनिक, समृद्ध र सुशासित बनाउने नयाँ आशा जगाएको छ।यसरी वालेन्द्र शाहले प्रस्तुत गर्नुभएको चुनावी सङ्कल्पले शिक्षा, स्वास्थ्य, पूर्वाधार, कृषि र सुशासनका हरेक पक्षलाई मसिनो गरी समेटेको छ। नागरिकको विश्वासलाई काममा रूपान्तरण गर्ने र राजनीतिलाई पूर्णतः सेवाको भावले अगाडि बढाउने उहाँको यो प्रतिबद्धताले झापा ५ को भविष्यलाई नयाँ दिशा दिने निश्चित देखिन्छ। जनअपेक्षा अनुरूपको काम गर्न आफू तयार रहेको र विकासका मुद्दामा कुनै सम्झौता नगर्ने शाहको अडानले मतदाताहरूमाझ सकारात्मक तरङ्ग पैदा गरेको छ। उहाँले अघि सार्नुभएका यी कार्ययोजनाहरू कार्यान्वयन भएको खण्डमा झापा ५ नमूना क्षेत्रको रूपमा विकसित हुने आधारहरू प्रशस्त देखिएका छन्।
रवि र बालेनले आज घण्टाघरमा सम्बोधन गर्ने
सुर्खेत, ७ फागुन : आगामी फागुन २१ गते हुने आम निर्वाचनको पूर्वसन्ध्यामा राष्ट्रिय स्वतन्त्र पार्टी (रास्वपा) ले आफ्नो चुनावी अभियानलाई देशव्यापी रूपमा तीव्र पारेको छ। यसै क्रममा आज कर्णाली प्रदेशको राजधानी सुर्खेतस्थित घण्टाघर चोकमा रास्वपाले एक विशाल आम सभा आयोजना गर्दैछ।सभालाई रास्वपाका सभापति रवि लामिछाने र वरिष्ठ नेता बालेन शाहले सम्बोधन गर्ने कार्यक्रम रहेको छ।हिजो मात्र सुदूरपश्चिमको धनगढीमा आयोजित विशाल आम सभा सम्पन्न गरी दुवै नेताहरू सुर्खेत आइपुगेका हुन्। धनगढीको सभामा जनसागर उर्लिएपछि रास्वपाका नेताहरू थप उत्साहित देखिएका छन्। सुर्खेतको घण्टाघरमा हुने आजको सभामा पनि ठुलो संख्यामा समर्थकहरूको उपस्थिति रहने अपेक्षा गरिएको छ।निर्वाचनको मिति नजिकिँदै जाँदा रास्वपाले यस पटक स्पष्ट बहुमत मात्र नभई दुई तिहाइ ल्याउने दाबी गर्दै आएको छ। सभापति लामिछाने र नेता शाहले देशका विभिन्न भागमा पुगेर जनतालाई "परिवर्तनका लागि घण्टी" मा मतदान गर्न अपिल गरिरहेका छन्।रास्वपाले यस पटकको निर्वाचनलाई "नयाँ र पुराना शक्तिबीचको निर्णायक लडाइँ" को रूपमा व्याख्या गर्दै आएको छ। आजको सम्बोधनमा रवि र बालेनले कर्णालीको विकास र राष्ट्रिय राजनीतिका बारेमा कस्तो अभिव्यक्ति दिन्छन् भन्नेमा सबैको चासो रहेको छ।
बालेन शाह आज चौथो पटक निर्वाचन क्षेत्र आउँदै, मतदातासँग प्रत्यक्ष संवाद गर्ने
दमक, झापा । राष्ट्रिय स्वतन्त्र पार्टीका वरिष्ठ नेता तथा झापा क्षेत्र नम्बर ५ का उम्मेदवार बालेन्द्र शाह (बालेन) आज चौथो पटक आफ्नो निर्वाचन क्षेत्र आउनुहुँदैछ। शाह आज दिउँसो विराटनगर विमानस्थल हुँदै झापा ५ प्रवेश गर्ने कार्यक्रम रहेको उहाँका सचिवालय सदस्य सुरेन्द्र बजगाईंले जानकारी दिनुभयो।मनोनयन दर्तापछि यसअघि नै तीन पटक झापा ५ पुगिसक्नुभएका शाहले यसपटक पनि दमक, कमल, गौरादह र गौरीगञ्ज क्षेत्रका मतदाताहरूसँग प्रत्यक्ष संवाद गर्ने शैलीलाई नै निरन्तरता दिनुहुनेछ। रास्वपा झापा क्षेत्रीय सभापति भेषराज भट्टराईका अनुसार शाहले औपचारिक सभा भन्दा पनि मुख्य–मुख्य स्थानमा स्थानीयसँग भेटघाट गरी क्षेत्रको अवस्थाबारे जानकारी लिनुहुनेछ। अन्तिम समयमा मात्र आगमनको निश्चित समय र स्थान तय हुने भएकाले सुरक्षा र व्यवस्थापनमा केही चुनौती देखिए पनि मतदाताहरूमा भने निकै उत्साह देखिएको छ।
चुनावी सरगर्मी: केपी ओली आज झापा आउँदै, फागुन ६ गतेसम्म मतदाताकै बीचमा रहने
दमक, झापा । आगामी फागुन २१ गते हुने प्रतिनिधिसभा सदस्य निर्वाचनको मिति नजिकिएसँगै झापा क्षेत्र नं. ५ मा राजनीतिक सरगर्मी निकै तीव्र बनेको छ। यसै क्रममा नेकपा (एमाले) का अध्यक्ष तथा यस क्षेत्रका उम्मेदवार केपी शर्मा ओली आज पुन: आफ्नो निर्वाचन क्षेत्रका मतदाता भेट्न झापा आउन लाग्नुभएको हो।अध्यक्ष ओली आज बिहान १० बजेर २० मिनेटमा काठमाडौँबाट भद्रपुर विमानस्थल ओर्लिएर सिधै निर्वाचन क्षेत्रमा प्रवेश गर्ने तालिका छ। आज उहाँले शिक्षक भेला, धिमाल जातिको भेला तथा मुस्लिम समुदायका नागरिकहरूसँग आयोजना हुने छुट्टाछुट्टै कार्यक्रममा सहभागीता जनाउनुहुनेछ। एमाले झापाका सचिव तुलसी कार्कीका अनुसार यी कार्यक्रमहरूपछि ओलीले दमक–२ स्थित आफ्नो अस्थायी निवासमा विभिन्न भौगोलिक क्षेत्रका कार्यकर्ता र आम नागरिकहरूसँग प्रत्यक्ष भेटघाट गर्नुहुनेछ।पार्टीका केन्द्रीय सदस्य तथा झापा क्षेत्र नं. ५ का चुनावी कमाण्डर देवेन्द्र दाहालका अनुसार ओली फागुन ६ गतेसम्म झापामै रहेर चुनावी अभियानको नेतृत्व गर्नुहुनेछ। यस अवधिमा दमक क्षेत्रका विभिन्न गाउँ र टोलमा पुगेर घरदैलो गर्ने तयारी गरिएको छ। रुट अनुसार हरेक दिन कम्तीमा ६ देखि ७ स्थानमा कार्यक्रमहरू सञ्चालन हुनेछन्। यसअघि पनि ओलीले माघ २३ गते झापा आएर ७ दिनको अवधिमा करिब ८० वटा गाउँको भ्रमण गरिसक्नुभएको छ।यसैबीच, निर्वाचन परिचालन समिति दमक-३ ले आफ्नो क्षेत्रमा चुनावी अभियानलाई सशक्त बनाउन दुई दिने विशेष भेलाको आयोजना गरेको छ। निर्वाचन आयोगले फागुन ४ गतेदेखि प्रचारप्रसारका लागि अनुमति दिएसँगै एमालेले आक्रामक ढङ्गले चुनावी कार्यक्रम अघि बढाउन लागेको हो। जसअनुसार:फागुन ४ गते: दमक-३ को आमचोकमा बेलुका ४:०० बजे विशाल चुनावी भेला हुनेछ।फागुन ५ गते: बिहान ११:०० बजे दुम्से स्कुल अगाडि र ११:३० बजे तल्लो क्षेत्र टुकुरेस्थित बिजनेस टावरमा अध्यक्ष ओलीले सम्बोधन गर्ने कार्यक्रम तय भएको छ।पार्टीले आफ्ना सम्पूर्ण कार्यकर्ता, समर्थक र आम मतदाताहरूलाई यी कार्यक्रमहरूमा सहभागी भई अभियानलाई सफल बनाउन आह्वान गरेको छ।
निर्वाचन शान्तिपूर्ण रूपमा सम्पन्न गराउन प्रधानसेनापतिको विशेष निर्देशन
काठमाडौँ । प्रधानसेनापति अशोकराज सिग्देलले आसन्न प्रतिनिधिसभा सदस्यको निर्वाचनलाई शान्तिपूर्ण रूपमा सम्पन्न गराउन विशेष निर्देशन दिनुभएको छ । महाशिवरात्रि तथा २६२औँ सेना दिवसका अवसरमा आज सैनिक मुख्यालयमा आयोजित विशेष कार्यक्रममा नेपाली सेनाका सकल दर्तालाई शुभकामनासहित सम्बोधन गर्दै उहाँले नेपाली सेनाले विभिन्न क्षेत्रहरूमा निर्वाह गर्दै आइरहेको जिम्मेवारीलाई उत्कृष्ट ढङ्गले पूरा गर्ने क्रममा निर्वाचनलाई शान्तिपूर्ण रूपमा सम्पन्न गराउन समेत विशेष निर्देशन दिनुभयो । उहाँले नेपालको गौरवमय गाथा, परम्परा, संस्कृति, चिन्न, गौरव गर्न तथा इतिहासका पाठहरूबाट सिक्न सबै सैनिक तालिममा नेपाल र नेपालीको इतिहास अध्ययन र अध्यापन गराउन समेत निर्देशन दिनुभएको सैनिक जनसम्पर्क तथा सूचना निर्देशनालयले जनाएको छ ।आजै आयोजित एक फरक कार्यक्रममा उहाँले कर्तव्य पालनाको सिलसिलामा जीवन उत्सर्ग गर्ने सैनिकहरूको सम्मानमा वीर स्मारक तथा सैनिक मञ्च टुँडिखेलमा श्रद्धा सुमन अर्पण गर्नुभयो । त्यसैगरी उहाँले छाउनीस्थित वीर स्मारकमा पनि वीरगति प्राप्त सैनिकका परिवारलाई सम्मान गर्नुभएको निर्देशनालयले जनाएको छ ।
एमालेको चुनावी सरगर्मी: फागुन ४ र ५ गते दमकका विभिन्न स्थानमा अध्यक्ष ओलीले सम्बोधन गर्ने
दमक, झापा । आगामी फागुन २१ गते हुने प्रतिनिधिसभा सदस्य निर्वाचनको मिति नजिकिएसँगै झापा क्षेत्र नं. ५ मा राजनीतिक सरगर्मी तीव्र बनेको छ। यसै क्रममा नेकपा (एमाले) निर्वाचन परिचालन समिति दमक-३ ले आफ्नो क्षेत्रमा चुनावी अभियानलाई थप सशक्त बनाउन दुई दिने विशेष भेला तथा आमसभाको आयोजना गर्ने भएको छ। यही फागुन ४ र ५ गते दमकका विभिन्न तीन स्थानमा आयोजना हुने उक्त कार्यक्रमहरूमा झापा क्षेत्र नं. ५ का उम्मेदवार तथा नेकपा (एमाले) का अध्यक्ष केपी शर्मा ओलीको विशेष उपस्थिति रहने समितिले जनाएको छ।निर्वाचन प्रचारप्रसार समिति दमक-३ का अनुसार अध्यक्ष ओलीले फागुन ४ गते पहिलो दिन दमक-३ स्थित आमचोकमा बेलुका ४:०० बजे आयोजना हुने विशाल चुनावी भेलालाई सम्बोधन गर्नुहुनेछ। त्यस्तै, दोस्रो दिन फागुन ५ गते बिहान ११:०० बजे दुम्से स्कुल अगाडि र त्यसलगत्तै ११:३० बजे तल्लो क्षेत्र टुकुरेस्थित बिजनेस टावरमा अर्को चुनावी सभा हुने तय भएको छ।निर्वाचन आयोगले फागुन ४ गतेदेखि १८ गतेसम्मका लागि सभा, जुलुस र घरदैलो जस्ता प्रचारप्रसारका कार्यक्रम गर्न अनुमति दिएको छ। सोही समयसीमा सुरु भएकै दिनदेखि एमालेले आफ्नो पकड क्षेत्र मानिने दमक-३ बाट आक्रामक चुनावी अभियान थाल्न लागेको हो। समितिले पार्टीका सम्पूर्ण कार्यकर्ता, शुभचिन्तक, समर्थक तथा आम मतदाताहरूलाई उल्लेख्य संख्यामा उपस्थित भई कार्यक्रम भव्य रूपमा सफल बनाउन हार्दिक अनुरोध गरेको छ।
प्रतिनिधिसभा निर्वाचन: ६३ जिल्लाको मतपत्र छपाइ सम्पन्न, आजदेखि ढुवानी सुरु
आगामी फागुन २१ गते हुने प्रतिनिधिसभा सदस्य निर्वाचनका लागि मतपत्र छपाइको काम अन्तिम चरणमा पुगेको छ। निर्वाचन आयोगका अनुसार हालसम्म ६३ जिल्लाका १३३ निर्वाचन क्षेत्रको मतपत्र छपाइ कार्य सफलतापूर्वक सम्पन्न भएको छ।भक्तपुरस्थित जनक शिक्षा सामग्री केन्द्रमा भइरहेको छपाइ कार्यअन्तर्गत हालसम्म एक करोड ७१ लाख ६३ हजार मतपत्र तयार भइसकेको आयोगका सहायक प्रवक्ता प्रकाश न्यौपानेले जानकारी दिनुभयो।कुन–कुन जिल्लाको सकियो छपाइ?आयोगका अनुसार कर्णाली, सुदूरपश्चिम, लुम्बिनी, गण्डकी, कोशी र बागमती प्रदेशका अधिकांश जिल्लाको छपाइ सकिएको छ। जसमा झापा, मोरङ, सुनसरी, इलाम, कास्की, रुपन्देही, बाँके, दाङ, चितवन र डोल्पा लगायतका ६३ जिल्ला रहेका छन्। अब काठमाडौँ उपत्यका र आसपासका १४ जिल्लाको मात्र मतपत्र छाप्न बाँकी छ, जुन आगामी तीन दिनभित्र सकिने अनुमान गरिएको छ।कर्णालीबाट ढुवानी सुरु छपाइ सम्पन्न भएसँगै आयोगले आजैदेखि मतपत्र ढुवानीको कार्य समेत थालनी गरेको छ। पहिलो चरणमा कर्णाली प्रदेशका १० जिल्ला (सल्यान, रुकुमपश्चिम, डोल्पा, मुगु, हुम्ला, कालिकोट, जुम्ला, जाजरकोट, दैलेख र सुर्खेत) का १२ निर्वाचन क्षेत्रका लागि मतपत्र पठाइएको छ।छपाइ र प्याकिङको अवस्था:प्याकिङ: हालसम्म १५ हजार ३७१ बाकस मतपत्र प्याकिङ भइसकेको छ। दैनिक करिब १ हजार बाकस प्याकिङ भइरहेको छ।छपाइ दर: हाल दैनिक ११ देखि १५ लाखको संख्यामा मतपत्र छपाइ भइरहेको छ।लक्ष्य: प्रत्यक्षतर्फको निर्वाचनका लागि कुल दुई करोड तीन लाख २३ हजार मतपत्र छाप्नुपर्ने आयोगको कार्यतालिका छ।गत पुस २२ गतेदेखि सुरु भएको छपाइ प्रक्रियामा सुरुमा करिब ११ लाख नमूना मतपत्र छापेर जिल्ला–जिल्लामा पठाइसकिएको छ। दोस्रो चरणको ठूलो हिस्सा छपाइ सकिएर अब रुजु र ढुवानीको तयारीलाई तीव्रता दिइएको छ।